تجربة شباك النبيذ الإيطالية وصلت ع سوق جونية!
من بعد ما صار شباك النبيذ The Winery Window محطة مشهورة للزوار والسياح بسوق البترون، هلق هالتجربة المميزة وصلت ع قلب جونية!
The Winery Window فتح فرعو التاني بسوق جونية، وجاب معه لمسة إيطالية حلوة مستوحاة من “Buchette del Vino” التاريخية بفلورنس، يلي كانت من زمان تقدّم النبيذ بالشارع من شبابيك صغيرة محفورة بحيطان الأبنية القديمة.
جونية، المعروفة بأجوائها الحيوية وشوارعها التراثية، صار في سبب جديد يخلي الناس تزورها. هالمشروع بيقدم تجربة سياحية بتخلّي الزائر يحس حالو عم يعيش لحظة من شوارع فلورنسا القديمة ولكن بجو لبناني.
الفكرة بسيطة وحلوة بنفس الوقت: بتقرب ع الحيط، بتختار إذا بدك كاس نبيذ أحمر، أبيض، روزيه، أو حتى بيرة (وغيرها كتير خيارات)، بتاخد التوكن، بتحطو بالشباك الصغير، بتدق الجرس، وبعدها بتستلم مشروبك بطريقة مميزة وسريعة.
وجود شباك النبيذ بجونية عطى السوق نكهة جديدة، خصوصًا يلي بيحبوا يتمشوا. وصارت الوقفة عندو محطة ضرورية لكل حدا بدو يستمتع بجولة حلوة وكاس بإيدو.
إذا حبيتوا تجربة The Winery Window بالبترون، هلق صار فيكن تعيشوا نفس الأجواء بجونية. حضّروا حالكن، دقّوا الجرس، خدو كاسكن… وكمّلوا تمشاية ما بتنتسى بين شوارع السوق.
صورة الغلاف من: Joe Mouchati ع Google Maps و Nayla El Khoury ع انستغرام.
