صار في سوق ورد كل سبت بالصيفي (الدخول مجاني)
إذا عم تفتشوا ع مشوار حلو ومختلف بقلب بيروت لتغيروا جو و تستمتعوا بالويك اند، صار فيكن تزوروا سوق ورد جديد ومميز بمنطقة الصيفي كل يوم سبت.
شو ناطركن خلال سوق الورد – الصيفي؟
هيدا النشاط رح يبلش ابتداءً من 6 حزيران، من الساعة 11 الصبح ولغاية الساعة 3 بعد الضهر، ورح يكون فرصة مثالية لتنقوا أجمل أنواع الزهور والنباتات و تتعرفوا ع أصناف جديدة. والأهم من هيك إنّو الدخول مجاني للكل! فيكن تقضوا وقت ممتع بين الألوان و الروائح الطيبة، وتصوروا لقطات بتجنن بشوارع الصيفي الراقية.
هالسوق هو تعاون بين كافيه Galilee المحبوب والمطعم اللبناني Maryool، وبيجمع بين الورد، الأكل الطيب، والقعدة الحلوة بقلب بيروت. الفكرة بسيطة: بتفوتوا، بتطلبوا شي طيب من المنيو، بتستمتعوا بالقعدة، بتتسوقوا كم شغلة، وبتختاروا باقة ورد تهدوها لحدا غالي أو حتى تدلّلوا حالكن فيها.
مريول معروف بديكوره المهضوم، ومع الورد المنتشر بكل الزوايا بصير عنده سحر خاص. عدا عن أطباق بتحبّبكن بالأكل اللبناني أكتر وأكتر، مع اهتمام واضح بكل تفصيل صغير.
شوي عن Galilee:
أما Galilee، فصار من الكافيهات المفضّلة عند كتار ببيروت، خصوصاً لمحبي القهوة المختصّة والأماكن الهادية. الديكور فيه لمسة فنية مميزة، والقعدة بين النباتات والورد بتعطي إحساس بالراحة وبتبعدكن شوي عن عجقة المدينة.
بيتميّز Galilee كمان بالنشاطات والفعاليات اللي بينظمها بشكل مستمر، من ورشات تنسيق الورد وتصميم البوكيهات، لنادي الكتب واللقاءات الاجتماعية والثقافية.
ولعشّاق الورد، في ورشة تصميم بوكيهات بتاريخ 5 حزيران بـGalilee، فرصة حلوة لتتعلّموا أساسيات تنسيق الورد وتصمّموا بوكيه بإيديكن. للحجز أو الاستفسار، فيكن تتواصلوا على الرقم: 083 444 76.
إذا بعدكن ما قررتوا شو تعملوا هالويك إند، سوق الورد بالصيفي ممكن يكون من أحلى النشاطات اللي بتجمع بين الجمال، القعدة الحلوة، والأكل الطيب بقلب بيروت.
