تزلج بنص الصيف؟ أوّل تجربة سكي داخلي بلبنان!
إذا مشتاقين لموسم التزلّج من هلّق، أو بدكن تحسّنوا مهاراتكن، ففي شغلة يمكن ما كنتوا متوقّعين تلاقوها بلبنان. بمركز E-Fit بجلّ الديب، في آلة سكي داخلي (Indoor Skiing Machine) بتخلّيكن تتمرّنوا عالتقنيات طول السنة، ومن دون ما تحتاجوا للتلج.
هالتجربة الأولى من نوعها بلبنان، وهالنظام معمول ليساعدكن تحسّنوا التوازن، والسيطرة، ومهارات التزلّج بشكل عام. وخلال الجلسات، في مدرّبين بيعطوكن إرشادات وملاحظات مباشرة لتطوّروا أداءكن خطوة بخطوة.
سواء كنتوا مبتدئين وما جرّبتوا التزلّج قبل، أو بدكن تحسنوا مهاراتكن قبل طلعتكن الجاية ع فاريا، الجلسات بتركّز على بناء التقنية وزيادة الثقة بالنفس حتى بفترة الصيف وبرا الموسم.
وبصراحة، كمان هي بديل ممتع عن التمرين التقليدي بالنادي، وفرصة لتجرّبوا نشاط مختلف هالصيف. إذا كنتوا عم تتحضّروا لموسم التزلّج أو عندكن حشرية تعرفوا كيف الإحساس خلال التزلّج الداخلي، فهي من أغرب وأمتع النشاطات اللي ممكن تلاقوها بلبنان.
ونحنا متأكدين إنو رح يطلع كم واحد من عشّاق السكي ويقول: «إي بس هيدا مش متل التمرين عالثلج الحقيقي »… إي أكيد، ما حدا قال غير هيك. بس بالنهاية أحسن من ولا شي.
فيك تتواصل مع E-Fit عبر إنستغرام أو على الرقم 054 656 76 للمزيد من المعلومات.
