جنينة سرية بقلب مار مخايل…شوفوا هالمطعم الإيطالي!
بقلب مار مخايل، وبين البيوت التراثية يلي بعدها محافظة على روح بيروت القديمة، في محل بيقدر ياخدك برحلة ع إيطاليا من دون ما تترك المدينة. PizzAria، المطعم الإيطالي المحبوب بلبنان، فتح أبوابه قبل فترة بقعدة جوا بيت بيروتي تراثي ساحر! مع جنينة خضرا صارت من أجمل وجهات التراس ببيروت.
بمجرد ما تقطع البوابة، رح تحس إنك لقيت جنينة سرية بعيدة عن ضجيج بيروت. الشجر مضلل فوق الطاولات، والخضار لافف التراس من كل ميلة، والعريشة اللي فوقك بتخليك تنسى إنك بعدك بنص المدينة. شوي شوي، بيختفي صوت العجقة وبيحل محله رواق، كأنك بضيعة إيطالية صغيرة أو بحديقة بيت ريفي قديم.
المكان بيجمع بين سحر البيت البيروتي العتيق والأجواء الإيطالية الكلاسيكية، بطريقة بسيطة ومرتبة بنفس الوقت. ومن الكوكتيلات المميّزة وتشكيلة النبيذ اللبناني والعالمي، للباستا الطازة يلي بتتحضر يومياً بالمطعم، والمنيو الإيطالية الأصيلة…كل تفصيل معمول ليكمّل التجربة.
ويمكن أجمل شي بـ PizzAria إنو الجو بيشجّعك تطوّل القعدة. سواء كنت جايي على غدا هادي تحت الشجر، أو Aperitivo بعد الضهر، أو عشا رومانسي تحت الأضوية الخافتة، رح تلاقي حالك عم تستمتع بكل لحظة.
اليوم، PizzAria مش بس مطعم إيطالي. هو مكان بتهرب عليه من عجقة بيروت، وبتاخد فيه استراحة صغيرة بين الطبيعة، والأكل البيتوتي، والأجواء يلي بتخليك تحس إنك مسافر… ولو لساعتين بس.
