إطلاق باصات سياحية بطابقين لاستكشاف معالم جبيل!
إذا كنت بدك طريقة جديدة تحسّ حالك سائح ببلدك، صار فيك تكتشف وحدة من أقدم مدن لبنان بطريقة مختلفة. تم الإعلان رسميًا عن إطلاق “Byblos Panorama”، وهي تجربة سياحية جديدة بتعتمد على باصات كهربائية بطابقين، وبتاخد الزوّار بجولة على أشهر معالم المدينة.
انطلق المشروع برعاية وزيرة السياحة لورا لحود بالتعاون مع بلدية جبيل وجمعية تطوير السياحة هيميلكو.
الباصات بتقدملكن جولات بانورامية بكل أنحاء المدينة، وبتخلّي الركاب يشوفوا شوارع جبيل التاريخية، الآثار القديمة، المرفأ والأسواق الأثرية من زاوية جديدة.
وفي كمان تعليق صوتي مرافق للجولة بخمس لغات، كرمال تكون التجربة مناسبة للبنانيين وللسيّاح الأجانب بنفس الوقت.
أهم ميزة بهالمبادرة هي تركيزها عالاستدامة. الباصات بتشتغل بالكهربا 100%، وهيدا بيعني وسيلة أنضف وأقل تلوث لاستكشاف المدينة.
واللي بيعرف جبيل منيح وزارها ألف مرة بيعرف إنو ما بيملّ من تاريخها وتراثها، فليش ما تخططوا لمشوار هالويكند وتجربوا الباصات الجديدة Byblos Panorama؟
