شو مشاريعنا

لقينا مطعم معلّق حدّ شلالات كفرحلدا…هون الغدا غير!

إذا بعدكن عم تدوّروا على مشوار صيفي وقعدة فوق الخيال، لازم تحطّوا مطعم شلالات نهر الجوز بكفرحلدا – البترون على الليستا.

الطريق بحد ذاتها جزء من المتعة. جبال، خضار، وهوا عليل، ومع كل دقيقة بتقرّبوا فيها، بتحسّوا إنكن عم تتركوا وراكن ضجّة الحياة وداخلين على مهرب طبيعي مخبّى بين الجبال. وأول ما توصلوا، رح تستقبلكن شلالات نهر الجوز بالميّ الباردة وصوتها اللي بيعطي المحل سحر وهيبة.

ومن أجمل الأماكن هونيك هو مطعم شلالات نهر الجوز، المكان اللي بخلّيكن تعيشوا تجربة مختلفة عن أي مطعم تاني. التراس معلّق حدّ الشلال، والسفرة بتكون على بعد خطوات من الميّ، لدرجة بتحسّوا حالكن قاعدين تحتو. صوت الشلال برافقكن طول القعدة، والنسمة الباردة بتضيف جو ما بينوصف، خاصةً بأيام الصيف.

أما الأكل لبناني أصيل متل ما لازم يكون. مازات بلدية، مشاوي، أكلات بيتية، وسلطات طازة محضّرة بأجود المكوّنات، ومع كاس العرق البلدي بتكمل القعدة على أصولها. وفوق كل هيدا، الاستقبال الحلو والضيافة الدافية من أصحاب المطعم بيخلّوكن تحسّوا حالكن بين أهلكن.

وإذا خلصتوا الغدا، ما تستعجلوا بالرجعة. كفرحلدا فيها كتير أماكن بتستحق الاستكشاف. فيكن تتمشّوا حدّ النهر، تستمتعوا بالشلالات والينابيع الطبيعية، تسبحوا بالميّ العذبة، تركبوا البيسكلات، تخيّموا جنب النهر، أو ببساطة تقضّوا نهار هادي بالطبيعة. وإذا بتحبّوا التاريخ، المنطقة كمان غنيّة بالمعالم الأثرية، من بقايا معبد روماني لكنائس وأديرة قديمة.

إذا بدكن نهار صيفي مختلف، بمناظر بتاخد العقل، وأكل لبناني طيب، وقعدة ما بتننسى حدّ الشلال… مطعم شلالات نهر الجوز بكفرحلدا – البترون، ناطر يستقبلكن.

للحجز والاستفسار ع الرقم: 115 145 79.

فيكن تتابعوا المطعم ع انستغرام هون، وبتلاقوا الموقع بالتحديد وين بالرابط هون.