24 ساعة بقلب الغابة…ما تفوتوا مهرجان السنديان هالويك-اند!

مهرجان Oakenfest راجع ع غابة السنديان بضيعة لحفد ب 25 و26 تمّوز بنسخته العاشرة، ليجمع بين موسيقى لايف، التخييم، الأكل، وأجواء الطبيعة، ضمن تجربة بتستمرّ 24 ساعة بقلب الغابة.

انطلق Oakenfest لأول مرّة سنة 2013، ومن وقتها صار واحد من أكتر المهرجانات الموسيقية المستقلة المحبوبة بلبنان. ومن البداية، ما كان هدفه يجذب أكبر عدد من الناس، بس كان تركيزه على موسيقى، وتجارب مشتركة، و لقاءات حقيقية.

شو ناطركن هالويك إند؟

هالسنة، بيضمّ البرنامج مجموعة من الفنانين. هون أبرزهن: أفرايم، ألان أبي، التاسع، كريستينا كيروز، هادي، جنى صالح، لين أديب، مسعود، وبوستكاردز! مع عروض موسيقية بتناغم مع أجواء الغابة و الطبيعة. بالإضافة للحفلات، محضّر Oakenfest برنامج متكامل على مدى الويك إند.

نهار السبت، بترجع فعالية Street Studio بنسختها التانية، وبتجمع الموسيقيين وروّاد المهرجان بجلسة موسيقية مفتوحة بالهوا الطلق، مع سماح بلمونا.

أما الأحد، فبيبلّش مع Sunday Flow with Mira، وهي جلسة حركة وتمارين تنفّس مناسبة لكل المستويات، وسط أجواء الغابة الرايقة.

بعدها، بيجتمع الحضور حول طاولة الضيعة، وهي ترويقة مستوحاة من السفرة اللبنانية التقليدية. قبل ما ينطلق لقاء زجل معاصر بيعيد إحياء واحد من أقدم التقاليد الشفوية بلبنان بروح جديدة.

أما تجربة الأكل نهار الأحد، فبتكون مع Nation Station، وبتروح كل الأرباح لدعم النازحين، إلى جانب مطبخ Oaken المجتمعي، يلي بيحضّر أكلات بالتعاون مع طباخين من بلدة لحفد.

وهيدا البرنامج الكامل للمهرجان :

كمان، رح يتم بثّ أبرز لحظات المهرجان عبر راديو الحارة، بينما رح تكون منتجات المهرجان متوفّرة عبر Oakenstore، وريعها بيساهم بدعم Oakenhouse، المساحة يلي بتنظّم على مدار السنة حفلات موسيقية، جلسات استماع، ولقاءات مجتمعية.

ومتل كل سنة، بيضلّ الاهتمام بالبيئة جزء أساسي من هوية Oakenfest، من خلال تأمين مي شرب مجانية للحضور، واعتماد خطة متكاملة لإدارة النفايات بالتعاون مع Cedar Environmental.

وبنسخته العاشرة، بيكمّل Oakenfest رسالته كمهرجان بيحتفل بالموسيقى المستقلة، المجتمع، وفرحة تمضية الوقت سوا بقلب الطبيعة.

لمعلومات أكتر، تأكدوا تزوروا إنستغرام تبعن. وإذا بعدكن ما حجزتوا تذاكر، اكبسوا هون.

شوفوا كمان:

بعد إنفجار 4 آب…مطعم إم نزيه رجع على الأشرفية!