7 مشاوير عفوية فيكن تعملوها مع أصحابكن ببيروت

بدكن تطلعوا من البيت وما عندكن فكرة وين تروحوا؟ جمعنالكن 7 أماكن ونشاطات عفوية ببيروت بتقدروا تعملوها مع أصحابكن بآخر لحظة، سواء على الغدا، القهوة، أو سهرة حلوة.

1. زوروا أم نزيه بالأشرفية لأول مرة من 6 سنين

بعد ما فتح أبوابه من جديد من كم يوم، صرنا متحمسين نرجع نزور أم نزيه بقلب الأشرفية ونسترجع أحلى الذكريات. بعده محافظ على نفس جوّ البيت اللبناني الدافي، مع التفاصيل القديمة وكمية نوستالجيا بتاخدكن لزمان.

أكيد ما بتكمل القعدة بأم نزيه من دون سفرة مليانة مازة! غير الأطباق اليومية والأكلات البيتية يلي الزباين بيحبوها من سنين.

المطعم بعده بيجسّد سحر بيروت القديمة، وبيخلّيكن تحسّوا كأنكن عم تتغدّوا ببيت تيتا وجدو، بقعدة حلوة وأكل لبناني بيتوتي.

الأكل لحالو قصة، بس روح المكان هي اللي بتضل بالبال. من الموسيقى للوجوه المألوفة وقعدات الغدا الطويلة، بيضل أم نزيه هو المطعم اللي الكل كان ناطر رجعته.

ورغم كل شي، بعد في مؤسسات لبنانية عم ترجع توقف ع إجريها.فيكن تقروا أكتر عن رجعة أم نزيه هون.

2. روحوا على ليالي البيتزا بـ Mavia Bakery بالجميزة

صار عندكن سبب جديد تزوروا هالفرن كل جمعة.

كل أسبوع بيعملوا ليالي بيتزا بالفرن الحطب، وهلّق صار فيكن تستمتعوا فيها بمحلّن الجديد والأكبر بالجميزة.

3. اكتشفوا واحد من أقدم محلات الأسطوانات ببيروت، سوبر أوت بمار مخايل

إذا بتحبّوا الموسيقى، مرقوا على Super Out.

من سنة 1979 وهالمحل مليان Vinyls وCDs وكاسيتات قديمة. نص التسلاية إنكن تفتّشوا بين الرفوف وتلاقوا شي مميّز.

وما تنسوا تحكوا مع صاحب المحل، روي حايك، وتسألوه عن اختياراته المفضّلة أو عن المجموعة المخباية فوق. من تجربتنا معه، ذوقه كتير رفيع.

4. لاقوا كتاب جديد بـ Folk Beirut، مساحة ثقافية مخباية بالحمرا

إذا بدكن محل هادي تقروا فيه أو تشتغلوا شوي، Folk Beirut خيار كتير حلو.

هالمكتبة والمساحة الثقافية بتحسّوها أقرب لقعدة بيت دافية من إنها مكتبة.

فيها رفوف كتب مختارة، زوايا للدراسة، وفعاليات أدبية بتخلّيكن بسهولة تقضّوا فيها نهار كامل.

ويمكن بالأخير يصير بدكن تخبّوا هالمحل عن العالم، لأنّه من أهدى الأماكن بالحمرا.

5. تسوّقوا أحلى منتجات لبنانية من Luanatic بالأشرفية

إذا بتحبّوا الأشيا اللبنانية المميّزة، أو بدكن هدية لصديق مغترب بيعشق لبنان، Luanatic هو المكان المناسب.

رح تلاقوا فناجين قهوة، ساعات حيطان لبنانية، ديكور بطابع قديم، Tote Bags، بطاقات بريدية، تعاليق، وأغراض كتير بتلفت النظر.

وبعد ما تخلصوا، فيكن تمرقوا عـ Café Amor يلي حدّه وتشربوا قهوة.

6. اسهروا على أنغام الفينيل بـ Jive

إذا بدكن بار بأجواء مختلفة، جرّبوا Jive.

مستوحى من حقبة الديسكو، وهالمكان بالجميزة بيجمع بين كوكتيلات مميّزة ومجموعة كبيرة من أسطوانات الفينيل يلي بتضل شغّالة طول الليل.

كوكتيلات طيبة، موسيقى Vinyl، وأجواء حلوة بتخلّي أي سهرة أحلى.

7. دلّلوا حالكن بالـ Pain Perdu الترند من Nayla بالأشرفية

إذا بعدكن ما جرّبتوا الـ Pain Perdu الترند من Nayla، هيدي فرصتكن.

بيجي ع شكل مكعبات مع Vanilla Soft Serve وصوص كراميل أو شوكولا، وبيستاهل التجربة.

خبرونا، أي مشوار أو نشاطات عفوية رح تجربوا ببيروت هالصيف؟

شوفوا كمان:

انسوا صالات السينما… هالصيف فيكن تحضروا أفلام ع البحر!