في عصير Maccaw مقلّدة بالسوق؟ خلونا نشوف شو القصة

شابة لبنانية ع تيك توك @genuine_gigi نشرت فيديو صار تقريبًا 500 ألف مشاهدة، عم تقارن فيه بين علبتين عصير من Maccaw.

هي لاحظت كذا فرق بين العلبتين Maccaw، وعم تسأل إذا وحدة منهن ممكن تكون مقلّدة. وحدة مكتوب عليها “Banana Strawberry Milk” وعليها صورة تفاحة، والتانية مكتوب عليها “Banana Strawberry Shake” وما عليها صورة التفاحة.

كمان لاحظت إنو وحدة مكتوب عليها “Rich in Vitamin C”، والتانية لا. ووحدة عليها شعار “100% Santé”، بينما التانية ما عليها. في كمان فرق بالخطوط وبطريقة كتابة المعلومات. وحدة مكتوب عليها بالإنكليزي بس، والتانية فيها إنكليزي وعربي.

المنتج يلي مكتوب عليه “Banana Strawberry Drink” والظاهر بالفيديو، مش موجود على موقع LibanJus.

Maccaw هي وحدة من الماركات التابعة لـLibanJus، شركة لبنانية لتصنيع المأكولات والمشروبات تأسست سنة 1959. Maccaw موجودة من زمان وبتنتج أنواع مختلفة من العصير ومشروبات الفواكه، ومن بينها Banana Strawberry Shake الموجود على ليستا منتجاتها الرسمية.

منتجات Maccaw بتتصنّع بلبنان، وعلبة Banana Strawberry Shake بحجم 250 مل بتنباع بالسوق المحلي بحوالي 0.60 دولار.

بس هل المنتج مقلّد عنجد، أو هيدي حملة تسويقية؟

السؤال الأساسي هون: هل عنجد وحدة من هالعلب مقلّدة؟ بالنهاية، ليه حدا يقلّد عصير سعره أصلًا أقل من دولار؟

وفي سؤال أهم: شو موجود جوّا العلبة؟ إذا المنتج مش من Maccaw، طبيعي الناس تسأل من وين إجا، وكيف انصنع، وإذا خضع لفحوصات سلامة الغذاء نفسها يلي بتخضع إلها منتجات الشركة.

والتعليقات على الفيديو كمان سألت إذا المنتج التاني آمن للشرب، وفي ناس طلبت من Maccaw توضّح شو عم يصير.

بس في احتمال تاني: يمكن كل هالقصة تكون حملة تسويقية.

بالفترة الأخيرة، صارت بعض الماركات تعتمد على أفكار بتخلّي الناس تحكي وتحلّل وتفتّش ورا القصة ع السوشيل ميديا. وكل ما قصة تنتشر، بيطلع ناس يشرحوا كيف هيدا كله جزء من خطة تسويقية.

بس في فرق بين إنك تخلي الناس تحكي عن منتجك، وبين إنك تخليهن يحبّوه ويثقوا فيه.

خلاصة الحكي…

إذا Maccaw عنجد عملت علبتين مختلفتين وتركت الناس تشك إذا في منتج مقلّد بس كرمال تعمل ضجة، فهيدي طريقة غريبة للتسويق. خاصةً إنو الموضوع عم يخلّي الناس تشك إذا المنتج يلي عم يشتروا آمن أو لا.

بس بنفس الوقت، بعد ما فينا نأكد إنو القصة بس حملة تسويقية. ممكن عنجد يكون في منتج مقلّد عم ينباع بالسوق اللبناني. الاختلافات بين العلبتين بتطرح أسئلة، خاصةً إنو نسخة “Banana Strawberry Drink” مش موجودة على موقع Maccaw الرسمي.

شو رأيك بكل هالقصة؟ شوف قسم #أخبار على موقعنا للمزيد.

شوفوا كمان:

Costco وصل ع سبينيس بلبنان – كيف الأسعار وشو رح تلاقوا؟