تصاميم زهير مراد وبأسعار أقرب للكل… مجموعة جديدة مع ALDO!

أطلق مصمم الأزياء اللبناني زهير مراد مجموعة حصرية مع العلامة التجارية الكندية للأحذية و الإكسسوارات ALDO. وهو عبارة عن تعاون بيجمع بين لمسته المعروفة وتصاميم ALDO بأسعار أقرب لكل الناس.

بتضمّ المجموعة 20 قطعة مختلفة، من الأحذية والشنط للمجوهرات و النظارات الشمسية، وكلّها مستوحاة من أسلوب زهير مراد و تفاصيله المميّزة.

ومن بين القطع، بتلاقوا صنادل بكعب عالي، وأحذية سهرة مفتوحة من ورا، وجزادين مزينة بتفاصيل لافتة، بالإضافة لشنط كتف و مجوهرات ونظارات شمسية. فيكن تتصفّحوا المجموعة كاملة من هون.

هالتعاون بيهدف يقرّب تصاميم زهير مراد من جمهور أكبر. هالشي من خلال نقل لمسات من عالم الأزياء الراقية لعالم الأحذية والإكسسوارات اليومية. أما الأسعار، بتتراوح بين 40 و300 دولار.

هل رح تكون مجموعة زهير مراد x ALDO متوفرة بلبنان؟

المجموعة رح تنطرح بحوالي 25 سوق حول العالم، من بينها الولايات المتحدة و بريطانيا وكندا وعدد من دول الشرق الأوسط. كمان، مجموعة Apparel Group، هي مسؤولة عن فروع ALDO ببعض أسواق المنطقة، ورح تكون مشاركة بإطلاق المجموعة بالشرق الأوسط.

بس فروع ALDO بلبنان بتتبع لشركة مختلفة، وهي Retail Group Lebanon، اللي بتضمّ ALDO ضمن العلامات التجارية التابعة إلها. وهيدا بيعني إنو إذا نزلت المجموعة بالشرق الأوسط مش بالضرورة توصل على المحلات بلبنان.

ولحدّ هلّق، ما صدر أي تأكيد رسمي عن توفّر المجموعة بلبنان، يعني على محبّي تصاميم زهير مراد ينطروا أي إعلان من Retail Group Lebanon.

لتشوفوا محتوى أكتر من هيك، تأكدوا تزوروا قسم # الأخبار على موقعنا.

شوفوا كمان:

إيلي صعب يتعاون مع H&M بمجموعة جديدة لكل يوم!