مطار القليعات بيكشف قريبًا عن أولى الوجهات ومواعيد الرحلات!

رسمياً، مطار رينيه معوّض القليعات – عكار، على بعد أيام من استعادة نشاطه وفتح أبوابه للعالم من جديد. بعد سنين طويلة من التوقّف، من المقرّر تنطلق الرحلات التجارية منو ابتداءً من الإثنين 14 كانون الأول 2026.

وأكد وزير الأشغال العامة والنقل فايز رسامني إنو الموعد بعده قائم، خلال جولة بالمطار برفقة النائب سجيع عطية وعدد من المسؤولين، لمتابعة التحضير قبل بدء التشغيل.

وشملت الجولة مختلف مرافق المطار، وتخلّلها بحث بالمتطلبات والتجهيزات اللازمة، و التنسيق بين الجهات المعنية من الناحية الأمنية و التشغيلية.

وبموازاة هالشي، عم تتواصل أعمال تجهيز مبنى مسافرين، ومنها تركيب أنظمة نقل الحقائب. كمان تسلّم المطار آلية إطفاء جديدة من الجيش اللبناني لتعزيز السلامة و التعامل مع أي حالة طارئة.

وبحسب شركة Sky Lounge Services، الشغل مستمر بالتنسيق مع الجهات المعنية لاستكمال التجهيزات وتطوير الخدمات تدريجياً، بهدف إعادة تفعيل المطار وفتح بوابة جوية إضافية للبنان، تكون كمان فرصة لدعم الحركة الاقتصادية و السياحية بعكار والشمال.

وهيدي أبرز المحطّات بالمرحلة الجاية:

– الأحد 15 تشرين الثاني 2026: رح تعلن الجهات المعنية رسميًا عن الوجهات الأولى للرحلات، ومواعيد الرحلات وأوقات الإقلاع. وكمان رح يبلّش فتح باب حجز التذاكر أونلاين ومن خلال وكالات السفر.

– الأحد 22 تشرين الثاني 2026: من المقرّر تنطلق الرحلات التجريبية، بالتزامن مع عيد الاستقلال.

– الإثنين 14 كانون الأول 2026: من المقرّر تنطلق الرحلات التجارية المنتظمة المخصّصة لنقل الركّاب بشكل رسمي.

وإذا التزموا بالموعد المحدّد، رح تكون هالرحلة أول خطوة برجعة مطار القليعات للحياة. وخبر حلو لأهالي عكار والشمال اللي ناطرين هالنهار من سنين!

لمتابعة آخر الأخبار، شوفوا قسم #الأخبار ع الموقع.

شوفوا كمان:

مراسلة جديدة ع تلفزيون لبنان… بس من الذكاء الاصطناعي!