٥ محلات بقدموا ترويقة لبنانية أصيلة

اليوم رح نخبركن عن محلات فيكن تستمتعوا فين بترويقة لبنانية أصيلة مع قعدة مهضومة!

١. الحلاب

أكيد كلنا منقصد الحلاب بس يكون عبالنا كنافة أو صنية حلو غير شكل بس مش الكل بيعرف إنو بحضر ترويقة من لي بحبها قلبكن: حمص، فول، بليلا، بيض عيون، سفيحة وقصص طيبة شغل دياتن. وأكيد ما بتكمل سفرتكن من دون كباية عصير ليمون لتبلشوا نهاركن مع كمشة فيتامين د.

الرقم: 1881
الفرع الأول: طرابلس
الفرع التاني: قاروط مول، بيروت

٢. أبو عبدالله، الدورة

إذا بتعرفوا طعمة تمكن فأكيد أبو عبدالله من المطاعم لي لازم تجربوها لأن شغلتو وعملتو يحضر أطيب ترويقة لبنانية ممكن تتخيلوها متل الفول، الفتة، البليلا، الحمص، القاورما والبيض وقصص بيستحليها قلبكن عبكرا. أطيب لقمة ع قلبكن عبارة عن صحن بيض مقلي مع لحمة مفرومة أو سجق حسب شو بتحبوا، بتغمسوا خبزتكن بالصحن وبتطلع لقمتكن ولا أطيب من هيك لقمة!

الرقم: 286 256 01

٣. خان جبيل، جبيل

مشهور بترويقة الخان وبقدم مناقيش طازة على كل الطعمات والنكهات لي بتستحلوها عبكرا مع صحن لبنة وزيتون وخضرا ومربى بلدي غير شكل. القعدة مهضومة وبهل طقس الحلو فيكن تستمتعوا بالقعدة برا وبس تخلصوا أكل فيكن تروحوا تتمشوا بسوق جبيل.

الرقم: 599 544 09

٤. العرزال، حراجل

من أجمل المطاعم لي ممكن تزوروها بالجبل وهلق بعدها القعدة لذيذة على التراس، بتاكلوا مناقيش صاج وباطاط مشوية وزيتون وحلوم مع رشة نعنع، يعني عندو هيك قعدة على البركة.

الرقم: 650 711 03

٥. كعكة سكوار Kaake Square، مار مخايل

لمحبي الكعك على بكرة الصبح ولكل حدا بحب يقعد على كراسي القش متل تبع البيوت اللبنانية العتيقة… رح تكونوا كتير مبسوطين بهل قعدة. جربوا كعكة الكنافة مع طعمة الورد، دوقوا الكعكة مع اللبنة والمكدوس،

كمان الكعكة بكشك حرزانة، وإذا بدكن شي أقوى فيكن تاكلوا كعكة بكفتا وحتى بتلاقوا كعك بشوكولا على التحلاية.

الرقم: 095 568 01

شوفوا كمان، ٥ مطارح ع البحر لتستمتعوا بمغيب الشمس بلبنان.