٤ متاحف ضروري تزوروها ببيروت مع حبيبكن

مين ما بحب يزور المتاحف، خاصة هلق بما إنو الطقس صار أبرد وأحلى ورومانسي أكتر.

كمشوا إيد حبيبكن أو حبيبتكن وعيشوا تجربة جديدة ومميزة رح ضلوا تتذكروها كل حياتكن وما تنسوا تاخدوا أجمل الصور!

يلا نزور هل ٤ متاحف ببيروت!

١. المتحف الوطني، المتحف

بضم المتحف الوطني مجموعة من القطع الأثرية لي بتعود للحضارة الفينيقية، الفرعونية والإغريقية وغيرها كتير، وقطع موزاييك وتماثيل ومنحوتات ومجوهرات وقطع نقدية قديمة ما بينزهق منا.

الرقم: 703 426 01
الدخول: رمزي

بس تخلصوا جولتكن اتجهوا عند كافي بداروا وتلذذوا بالأكل الشهي على الغدا أو العصرونية من المازة اللبنانية للحلو وفنجان الشاي السخن.

كافي بدارو: 674 602 03

٢. متحف ميم، الأشرفية

هل متحف المميز عبارة عن مغارة من الكنوز والجواهر المخفية بتشبه المتاحف لي بتشوفوها بقصور الأحلام. هل متحف بيعرض معادن من خلال واجهات قزاز مشغول فيا على الإضاءة منيح لتبرز جمالية شكل ولون كل جوهرة وقطعة نادرة، بالإضافة لورقة بتخبر عن كل موديل بشكل مختصر.

الرقم: 672 421 01
الدخولية: رمزية

بس تخلصوا جولتكن فيكن تاكلوا لقمة مع فنجان قهوة عند مطعم شبابيك بين الزهور والأضوية الخافتة.

قهوة شبابيك: 866 008 03

٣. متحف سرسق، الأشرفية

يعتبر متحف نقولا إبراهيم سرسق التاريخي من أهم المتاحف للفن الحديث والمعاصر ببيروت من سنة ال 1961 لليوم، وبيعرض كنوز فنية محلية وعالمية بشكل مميز وفخم ضمن ديكور بيشبه قصور الأحلام الموجودة بروما.

الرقم: 001 202 01
الدخول: مجاني

بس تخلصوا جولتكن فيكن تقعدوا بمطعم سرسق لي عندو قعدة مهضومة وفخمة بنفس الوقت بتحسوا حالكن سافرتوا لبعيد وعايشين بغير عالم.

قهوة سرسق: 512 200 01

٤. بيت بيروت، السوديكو

هل متحف عبارة عن بيت عتيق عايش الحرب الأهلية وبخبر الأوجاع لي مرقت على الشعب اللبناني من خلال الأثار تبع الحرب لي تم المحافظة عليها بشكلها التام لنرجع بالذاكرة. ومتل ما بقول المتل “تتذكر وما تنعاد”! بس حلو نرجع نشوف كل شي قطع على بيروت لي ما بتموت.

الرقم: 969 028 71
الدخول: مجاني

بس تخلصوا جولتكن فيكن تميلوا عند قهوة عزمي وتعيشوا الأجواء البيروتية العتيقة على الأصول.

قهوة عزمي: 773 773 81

شوفوا كمان، ياقوت بالسوق: مطعم لبناني على بلكون بناية أثرية.