كيف فيكن تقضوا نهار مميز بضيعة بكفيا؟

اليوم رح ناخدكن على ضيعة بكفيا التاريخية بالمتن، ضيعة جبلية بتجذب الناس بالشتي والصيف من جمالها. بيعود تسميتها للضيعة لكلمتين “بيت” و”كيفا”، بيعنو بالسريانية “البيت الحجري” أو “بيت الصخرة”. هالضيعة بتحمل تاريخ عريق وتراث لبناني غني قررنا نكتشفوا معكن اليوم. خلونا نشوف سوا كيف فينا نقضي نهار مميز بضيعة بكفيا الجبلية. 

قبل ما تبلشوا مشواركن بقلب بكفيا، لازم تجربوا ترويقة طيبة:

1. جربوا أطيب المناقيش والبيتزا من عند نسوان الفرن

فرن زغير كتير مهضوم ومحبوب بالضيعة، كمان بيقدموا فطاير شهية! 

الرقم: 056 109 81 

2. دوقوا الصاج ع كنافة من عند صاج الحنون

بيعملوا ترويقة صاج خفيفة وطيبة، وعندن طعمات مميزة متل الصاج على كنافة! 

الرقم: 292 593 03

وهلق صار وقت نكتشف جواهر الضيعة!

3. إبرموا بين البيوت القديمة وخدوا أجمل الصور

بكفيا فيها بيوت تراثية بتاخد العقل، مخباية بين حاراتها وعمرها سنين!

4. زوروا كنيسة مار عبدا بقلب بكفيا 

كنيسة أثرية بيرجع تاريخ بنائها للقرن السادس عشر!

5. زوروا أوتيل العامرية المهجورة بالضيعة

 واحد من أشهر الأماكن المهجورة بلبنان، كان على وقتو مقصد سياحي وفني بالمنطقة لحد ما إجت الحرب الأهلية. لتعرفوا عن قصتو الكاملة، إكبسوا هون. 

6. عملوا Hiking بين غابات الصنوبر بالمنطقة

فيكن تخيموا بين الشجر، تعملوا بيكنيك، تنبسطوا بدروب مشي ساحرة، وتقضوا وقت مميز بالطبيعة الجبلية. وصدوقنا، منظر غروب الشمس خيالي من فوق. 

ولتجربوا غدا أو عشا طيب، عندكن خيارات مميزة ببكفيا:

7. جربوا أطباق إيطالية أصيلة عند مطعم لوكاندا كورسيني 

مطعم إيطالي بيعمل باستا كريمي وبيتزا على الحطب. عندو جو رومانسي، ونبيد محلي، وقعدة خريفية وشتوية بتاخد العقل بقلب بيت لبناني تراثي . 

والحلو انو فيكن كمان تكفوا الليلة عندن بقلب بيت الضيافة. 

الرقم: 143 263 81 

8. جربوا مأكولات بحرية شهية من عند ملك البحر 

بتلاقوا عندو السمك على أنواعه، القريدس الطيب، المازة الشهية، وقعدتو كتير مكنكنة!

الرقم: 461 701 03 

9. دوقوا أطباق لبنانية غير شكل من عند مطعم تلة نصر

مطعم جبلي قاعد على التل بين شجر الصنوبر،  بيقدم مشاوي ممتازة، عندو قعدة دافية ومناظر جبلية ساحرة. 

الرقم: 404 690 71 

وين فيكن تقضوا الليلة بضيعة بكفيا؟ 

10. قضوا أحلى الأوقات الرومانسية بأوتيل الجمال وجوهرة بكفيا: أوتيل ماريلاند Merry Land

اللي بيميز هالأوتيل انو قاعد بحضن غابات الصنوبر، مليان ألوان وجمال. عندو غرف مريحة ومطعم لبناني وإيطالي وكمان جنينة ورد بتاخد العقل. 

الرقم: 390 777 71 – 390 980 04

11. أو فيكن تقضوا الليلة بقلب غابة الصنوبر عند Oakland Nas

بيت جبلي مهضوم للعيلة، عندو قعدات بالطبيعة وسهرات نار وأماكن للتخييم، وبتلاقوا عندن أحلى المناظر الجبلية! 

الرقم: 776 059 71 

خبرونا بالتعليقات، حبيتوا المشوار على بكفيا؟

شوفوا كمان، كيف فيكن تقضوا نهار مميز بضيعة بحمدون؟