٣ مطارح الإستثنائية لكل محبي الحلو ببيروت

مين عبالو كدشة حلو، بتدخل الفرحة على قلبكن وبطنكن؟ محلات الحلو كتيرة بلبنان، وحبينا اليوم ندوق حلويات مميزة لنحس بشوية سعادة. عملنا برمة زغيرة على محلات منحبها، لنخبركن عند 3 مطارح إستثنائية لكل محبي الحلو ببيروت. مشوا معنا!

1. Cafe Kunafe، الجميزة

المميز بهالكافيه انو بيتفنن بالكنافة اللي منحبها من قلب الجميزة. فيكن تجربوا عندن الكنافة وتغمروها بطعمة القهوة، أو تجربوها على الطريقة التقليدية بالكعكة أو بالطبق، مزينة بالقطر، زهر الليمون، والفستق الحلبي. بيعملوا القهوة على طريقتكن وبطعمات شرقية بتفتح النفس. فيكن تجربوا عندن حلويات غير متل  معمول مد بقشطة، أو معمول مد بجبنة، وحتى مخبوزات طازة متل الكرواسون والكيك المحشية شوكولا دايبة. 

2. Levant Beirut، الجميزة

محل حلويات كتير مهضوم بشوارع الجميزة، بيتميز بالطابع التراثي والنقشات البيروتية القديمة. مطرح بتقضوا في لحظات لطيفة على ريحة الحلويات والمكسرات، بتجربوا عندن قصص كتير طيبة متل حلو الداعوقية، النمورة، الصفوف، وكاسات مغلي مزينة بالزبيب والجوز واللوز ورشة من جوز الهند. 

وكمان عندن أصناف فريدة من الحلويات متل التارت بالشوكولا والحلاوة، والحلويات المحشية بالمكسرات والورد بتطلع طيبة مع القهوة العربية. 

3. Coffee Shot، جل الديب

ما في أطيب من كباية سحلب دافية بهيدا البرود! هالكافيه مش بس بيقدم قهوة بتشهي ريحتها، بس كمان سحلب معمول بطريقة مهضومة ولذيذة. أي وقت بيخطر عبالكن، “بتسحلبوا” عند هالكافيه وبتدوقوا سحلب طيب مع كعك. والحلو انو بتجي بقلب بوكس مهضوم لتجربوا السحلب وين ما كنتوا. 

شاركونا بالتعليقات يا محبي الحلو ببيروت، شو محلاتكن المفضلة؟

شوفوا كمان، مشوار تراثي عند عمو أمين، من أقدم لحامين بلدنا!