مهرجان دراق بكفيا: عشا قروي، دراق طازة، وعروض حلوة! (الدخول مجاني)

يلا على بكفيا! هالصيف ما عندكن عذر إنكن ما تزوروا بكفيا وتستمتعوا ب مهرجان دراق بكفيا السنوي! هالحدث التراثي بيجمع الكبير والصغير  بساحة الضيعة بين صناديق الدراق الطازة والمنتجات البكفاوية الطيبة.

من 4 لـ 13 تموز، ساحة السرايا ببكفيا رح تتحوّل لمقصد لكل حدا بيحب الأجواء القروية، الموسيقى، والأكل الطيب.

المهرجان بيتميز بأجواء حلوة كتير! هو فرصة تعيشوا يوم أو حتى ويك-أند ما بينتسى بين صناديق الدراق الملوّنة، ريحة المربى الطازة، وكيوسكات المونة اللي بتعبي قلبكن قبل ما تعبي بطنكن. عدا إنو بتتعرفوا ع أهل بكفيا يلي دغري بيفوتوا ع القلب!

ناطركن عشا قروي، أشغال يدوية مع سوق مليان دراق طازة، أكل ومشروبات، زيادة كمان مونة ضيعة ومنتجات محلية يدوية.

والأحلى إنو ما رح تملّوا لحظة، لأن برنامج مهرجان الدراق بكفيا مليان حفلات، ألعاب للولاد، وعروض ممتعة.

الدخول مجاني، يعني فيكن تزوروا قد ما بدكن من دون ما تحسبوها كتير! ورح يكون ع مدار أسبوعين خلال هيدي الأيام:

📅 الجمعة 4 تموز

6 المسا: Fusion Show مع بسام سروجي

9 المسا: سهرة ودبكة قروية مع الفنان رامي مراد

📅 السبت 5 تموز

6 المسا: مسرحية Pleo Live Summer Show

9 المسا: سهرة غنائية مع الفنان شربل ساميا

📅 الأحد 6 تموز

6 المسا: عرض جمباز – نادي الرياضي بكفيا

9 المسا: سهرة غنائية مع زياد نجم

📅 الجمعة 11 تموز

6 المسا: عرض ألعاب بهلوانية

9 المسا: حفلة غنائية مع ميشال صوايا

📅 السبت 12 تموز

6 المسا: عرض Louna Summer Vibes

9 المسا: سهرة موسيقية مع عازف البيانو مارك فتى وفرقته

📅 الأحد 13 تموز

8 المسا: حفلة غنائية مع الفنان إيدي أبو شقرا وفرقته

9 المسا: سهرة DJ مع D-Drop

تخيّلوا قاعدين مع العيلة والأصحاب،عم تتشاركوا دراق طيب وعصير طازة، والموسيقى عم تعبي الساحة. رح تحسّوا حالكن جزء من ضيعة عم تنبض حياة وفرح. هالصيفية ما تفوّتوا فرصة إنكن تدلّعوا حالكن بدراق بكفيا الطيب، وأجواءها القروية الساحرة!

حبيتوا مهرجان دراق بكفيا؟ شوفوا كمان، أحلى 26 مهرجان بكل لبنان خلال تموز 2025