وين تاكل وتضهر بجبيل؟ أحلى 14 محل تزوروهن هالصيف

جبيل بالصيف غير… بحرها، شوارعها القديمة، وأجواءها اللي بتنغرموا فيها من أول لحظة. بهالدليل رح نساعدكن تكتشفوا وين تاكلوا، شو تزوروا، ونعطيكن 14 شغلة تعملوها بهالصيفية لتكون زيارتكن بمدينة جبيل عنجد ما بتنتسى. يلا حضروا حالكن لجولة من العمر!

وين مننصحكن تاكلوا بقلب جبيل:

1. جربوا أطيب غدا أو عشا مأكولات بحرية بأرقى مطعم بجبيل: SOMO

إذا كنتوا من عشّاق الأكل البحري، SOMO بجبيل هو الوجهة المثالية. عندو قعدة صيفية روعة، ومثالي لضهرة عيد ميلاد أو سهرة مميزة مع الأصحاب أو حتى عشا بعد مشوار البحر.

المنيو عندن متنوع كتير، من مقبلات غنية متل شوربة المأكولات البحرية الحرة لباو محشي لوبستر ما بتلاقوا بمحل تاني. الأطباق الرئيسية تجربة بحد ذاتها، متل الـWagyu Sliders المصنوعين من لحم واغيو ياباني A5 الأصلي والكافيار المستورد دغري من أوروبا.

السوشي هون عنجد من الألذ، طازة ومكوناتو عالية الجودة!

باختصار، SOMO تجربة استثنائية بتجمع الجودة، الجو الحلو، وتنوع الأطباق يلي بيخلّي كل زيارة ممتعة وفريدة. لمحبي السي فود والسوشي، هيدا المحل لازم يكون ع الليستا.

فيكن تتواصلوا معن ع الرقم: 586 179 79، وتابعوهن ع انستغرام هون.

2. انبسطوا بالترويقة بنص السوق القديم عند خان جبيل

بيعمل خبزاتو طازة من الفرن، ومناقيش عندو لحالن قصة! بيقدملكن سفرة مغنّجة ع صينية قشّ لتنبسطوا بأطيب ترويقة بنص السوق!

الرقم: 900 805 76

3. قهوتكن ما بتكمل إلا عند كافيه Little Byblos جنب القلعة

تحلاية كيك مع قهوة ريحتها بتشهي، كلو ع منظر القلعة التاريخية وجنب الورود!

4. وأكيد ما تنسوا تميلوا ع e cafe الشهير وتاخذوا أحلى الصور

عدا عن الأكل العالمي الطيب، عندن أجمل قعدة مزهرة ورومانسية بالسوق، وقعدتو جوا بتتميز بالطابع الكلاسيكي.

الرقم: 316 163 03

شو أبرز المعالم السياحية بمدينة جبيل:

5. زوروا قلعة جبيل التاريخية

قلعة جبيل وقفة أساسية بكل زيارة. عمرها بيرجع للقرن الـ12، بنوها الصليبيين، ومن فوق بتاخدوا أحلى إطلالة ع المدينة والبحر.

6. ابرموا سوق جبيل القديم

هيدا السوق قلب جبيل التراثي. ممرات حجرية، محلات سوڤنيرز، كافيهات ومطاعم بأجواء روعة. مثالي تتمشّوا فيه وتشتروا شوية تذكارات.

7. تمشوا ع مينا جبيل الأثري

المينا القديم مقصد أساسي بجبيل، خصوصي عند الغروب. قعدوا بوحدة من الكافيهات ع البحر واستمتعوا بالمشهد.

8. خدوا أجمل الصور بالمسرح الروماني

بقايا مسرح من العصر الروماني، بيخبر قصص حضارات مرقت من هون وتركت أثرها. حلو تتصوروا هونيك.

9. زوروا متحف جبيل للمتحجرات البحرية: Memory of Time

إذا بتحبوا الجيولوجيا أو الديناصورات، هالمتحف صغير غني بالحفريات البحرية القديمة. تخايلوا عم تشوفوا حفريات عمرها مئات ملايين السنين؟

10. تعرفوا على معبد المسلات الأثري

معبد الأنصاب بجبيل، المعروف بمعبد المسلات، بيتميّز بمسلاته وحجارته المنتصبة وبيرجع للعصر البرونزي، وتم بنائه فوق معبد أقدم. وقفة قصيرة هونيك بتاخدكن سنين لورا.

11. زوروا كنيسة مار يوحنا مرقس

كنيسة قديمة جداً بيرجع تاريخها للعصور الوسطى، مبنيّة ع أنقاض معبد روماني. جواتها هدوء وسكينة رح تحسوها دغري.

12. تشمسوا أو اسبحوا ع شط جبيل العام!

شط جبيل رملي ومجاني ومن أنضف الشواطئ بكل لبنان، وعندو أحلى قعدة ع الغروب.

وين تحضروا غروب الشمس وتختموا نهاركن الطويل؟

13. احجزوا بKina Bar مع أحلى قعدة ع البحر

بتحضروا غروب الشمس مع أطيب المشروبات وقعدة غجرية بتاخد العقل

الرقم: 805 138 76

14. تفرجوا ع غروب الشمس من فوق جبيل كلها عند Mun less Gravity

مطرح فتح هيدا الصيف ع التل، وعندو قعدة رح تسحركن من أول ما تدخلوا!

الرقم: 090 339 70

خبرونا، حبيتوا دليل جبيل السياحي لهيدي الصيفية؟

شوفوا كمان، 17 من أجمل بيوت الضيافة على البحر بكل لبنان