صار في مكدوس باستا…هالمطعم بيبدع بالمونة اللبنانية ببيروت!

إذا بعد ما جرّبتوا Olea & Fig Bistro ببيروت، حضّروا حالكن لتجربة عنجد مختلفة. من قلب مونو، هالمطعم بيعرف كيف يحوّل المونة اللبنانية التقليدية لأطباق عصرية، ويمزجها بنكهات متوسطية وعالمية بطريقة مبتكرة.

من أبرز الأطباق يلي خطفت الأنظار: مكدوس باستا أو Makdous Linguine. تخيّلوا الباستا الإيطالية المحبوبة، معمولة مع لمسة من مونة البيت. المكدوس، يلي عادةً منلاقيه حدّ البيض أو اللبنة ع الترويقة، صار هون نجم الطبق الرئيسي مع باستا مطبوخة عالأصول. ومع الزعتر، البندورة، وكريمة اللبنة الناعمة، النتيجة صحن بيجمع بين الأصالة والإبداع، وبينقل المونة اللبنانية من مرطبان صغير عالرفّ لطبق بيشهي.

بس الإبداع ما بيوقف هون. المنيو مليان ابتكارات غير مكدوس باستا، متل: زعتر بوراتا مع بيستو الفستق، فرايز بالكشك والزعتر، خبز بكمّونة مع فيتا أو بالمشمش والزعتر مع لبنة معزة، وحتى طبق التين مع الجوز والزعتر البري وإكليل الجبل.

وإذا بتحبّوا الكوكتيلات، جرّبوا تشكيلتن الخاصة يلي منكهة بالتين، الزعتر والأعشاب المحلية، تجربة بتعكس روح المحل. وما في أجمل من تختموا السهرة بـ Oriental Pain Perdu مع حليب بالمستكة والفستق.

الأجواء عند Olea & Fig دافية وشيك، مثالية لغدا مع الأصحاب أو لعشا رومانسي. وهو العنوان الأول إذا بدكن تشوفوا كيف المونة اللبنانية فينا نقدّمها بروح جديدة وطعمة مميزة.

 بيفتح من التلاتا للأحد، من 12 الضهر لنص الليل. ما تنسوا تابعوهن هون. وللتواصل أو الحجز ع الرقم: 030 112 81.

حبيتوا هالمقال؟ شوفوا كمان:

آيس كريم كبة نية… بس بلبنان!

إذا مفكرين إنو جربتوا كل أنواع الكبة النية بلبنان، فإنتو غلطانين!