بوفيه عالتراس، حصيرة عالأرض، وركوب الحمار بالشوف هالخريف!

بنص قلب الشوف، وتحديدًا بكفر فقود، صار في مطرح جديد رح يسرقلكن قلبكن من أوّل زيارة. هالمطرح بيجمع كل شي بتحبّوه بمشوار واحد: البوفيه الطيب، الطبيعة، والجمعة الحلوة. التجربة هي تعاون بين مطعم مريول المحبوب و باب الشوف، وبيعملوها كل أحد بموقع بيخطف الأنفاس.

أوّل ما توصلوا بيستقبلكن بيت الحجر القديم بالضيعة. كتير رح تنبسطوا بالقعدة العربية ع التراس، مع حصيرة ع الأرض ومنظر الجبال قدامكن، شي بيذكّركن بأيام زمان!

أما سفرتكن بالهوا الطلق تحت الزيتون، مقدمة بقلب بيت جبلي تراثي قديم، قناطره بتزيد على الجو لمسة أصيلة، وبتحسّوا حالكن عم تتغدّوا ببيت جدو.

البوفيه المفتوح مليان من أطيب الأكلات اللبنانية والمحلية، من الطبخ البلدي للفواكة الموسمية والحلويات التقليدية، مع مشروبات وعصير وغيرو.

بس التجربة ما بتوقف ع الأكل. فيكن تتمشّوا بين الزيتونات وتشمّوا ريحة الأرض، تلعبوا ألعاب طاولة، تقرقعوا متّة وتضحكوا مع أصحابكن، وتتعرفوا ع ناس جديدة ع فنجان قهوة من إيدين عمّو نديم.

وإذا بتحبّوا المغامرة الخفيفة، فيكن تزوروا مزرعة الحمير الصغيرة، تفرحوا فيهن وتخلّوا ولادكن يقرّبوا منهن. ومع صوت الطبيعة وهدوء الضيعة، بتحسّوا إنو نهاركن مرق بسرعة وترك عندكن راحة ما بتنتسى.

الخريف هو الوقت الأنسب لهالتجربة. وراق الشجر عم تغيّر ألوانها، الهوا عليل، والشمس بعدها بتغمر التراس بدفا حلو. بهالمطرح، نهار الأحد بيتحوّل من يوم عادي ليوم كامل مليان ذكريات بتضل معكن عطول.

وين؟ كفر فقود، الشوف

ايمتن؟ كل أحد (تابعوهن لتعرفوا ايمتن بيخلص الموسم)

السعر؟ بـ 50 دولار للشخص

للحجز: 002 719 76

وما تنسوا تابعوا باب الشوف ع انستغرام هون لكل التفاصيل.

حبيتوا هالمقال؟ شوفوا كمان:

أطيب مطعم بوفيه وصل ع البقاع… “طاولة تورال” ناطرتكن!

 موعدكن بوقت موسم القطاف بين كروم عريقة، نكهات أصيلة، وأجواء بتجمع التاريخ، الطبيعة، والسفرة العامرة!