البيك اللبناني… معقول متل المطعم الأشهر بالسعودية؟

بيقولوا أهل طرابلس إنو مطعم الدجاج والكرسبي الأشهر بالسعودية إلو نسخة لبنانية! البيك يلي دوّخ الدني، وبعد ما شفنا نسخة لبنانية إلو بصيدا، اليوم لقينا “ابن عمو” بطرابلس! تعوا نتعرّف سوا على “البيك اللبناني” يلي صارلو أكتر من 10 سنين فاتح بالشمال، وهل عنجد هو نسخة عن البيك السعودي؟

متل البيك الأصلي أو لا؟

إذا كنتوا بتحبّوا طعمة البيك السعودي وما قدرتوا تسافروا لتجربوه، ممكن هيدا المحل يكون قريب بالطعم. اسمو البيك اللبناني وبتلاقوا بالتل، طرابلس. كنظرة أولى بيشبه مطعم البيك السعودي من التصميم والألوان. طيب، وكيف المنيو؟

صح، بتلاقوا عند البيك اللبناني الدجاج الكرسبي والبروستد، بس في شغلة ما بتلاقوها عندن بتميز البيك الأصلي عن غيرو: وجبة تشيكن ناغتس المعروفة بشكلها المربع وقرمشتها الخيالية.

وكمان شكل الخبزة مختلف عن البيك الأصلي! البيك اللبناني بيستعمل الخبز يلي كلنا منعرفو بس الأصلي عندو شكلو مربع:

هيدا عدا عن إنو البيك السعودي عندو وجبات مختلفة مش موجودة عند اللبناني متل فيليه السمك وفيش برغر والقريدس.

طيب، وصلتوا عند البيك اللبناني، شو لازم تطلبوا؟

أول ما تفوتوا عالمحل، الريحة بتاخد العقل. أطيب وجبة لازم تجربوها؟ الكرسبي وجيبو العائلية لتشاركوها مع رفقاتكن: 14 قطعة كرسبي مقرمش، بطاطا، توم، وسلطة كولسلو بتفتح النفس.

وما تنسوا البرغر! عندن برغر لحمة، دجاج، وتشيكن ساب، بس الملك بلا منازع هو زينغر البيك اللبناني: حرّ، مقرمش، وطري من جوّ، طعمتو قوية وبتشهي.

بس القصة ما بتوقف هون، لأنو “البيك اللبناني” مش بس كرسبي وبروستد. عندن كمان شاورما، فاهيتا، كباب، ومشاوي. يعني بتلاقوا كل شي بطلب واحد.

كيف الأسعار؟

والأسعار بتجنن! السندويشات والبرغر بين 5 و7 دولار، والوجبات الكاملة بين 7 و11 دولار، وحصصن كريمة وطيبة.

متلو أو لا؟

ممكن هالمحل بيقلّد البيك السعودي بالتصميم ووجبات الدجاج بس أغلب القصص الشهيرة عندو مش موجودة عند النسخة اللبنانية. ولكن هيدا ما بيعني إنو ما بيعتبر بديل محلي عن الKFC مثلاً أو أي محل كرسبي مشهور.

للطلب، فيكن تتصلوا ع الرقم 033 433 06، والمطعم بيفتح من الساعة 11:30 الصبح لحدّ نص الليل، يعني بتلاقوه دايمًا جاهز، من الغدا لوجبة آخر الليل. وما تنسوا تابعوا حسابن ع انستغرام هون.