وين فيكن تحضروا أفلام ببلاش ببيروت؟ شوفوا هالمحل

في كذا سينما فيكن تحضروا فيهن فيلم بأسعار مقبولة ببيروت، متل Metropolis Cinema أو Le Colisée، بس بتعرفوا إنّو فيك عنجد تحضروا أفلام ببلاش؟

Institut français du Liban بينزّل كل فترة عروض لأفلام فرنسية كلاسيكية، وكلّها ببلاش. وما تخافوا إذا ما بتعرفوا فرنسي، لأنّو الأفلام فيها ترجمة إنكليزي وعربي.

العروض بتتنوّع بين وثائقيات ورومنسيات، وبتضم كلاسيكيات كتير محبوبة وصولًا لأفلام أنيميشن لازم تنحضر.

كل شهر، Institut français du Liban بينزّل برنامج العروض، فإعملوا متابعة لإلن على إنستغرام لتشوفوا برنامج شهر كانون الأول أوّل ما ينزل. أمّا لشهر تشرين الثاني، بعد فيكن تلحقوا تحضروا فيلم الوثائقي La Ferme des Bertrand (2023) بـ 25 الشهر، وفيلم الأنيميشن Les Douze Travaux d’Astérix (1976) بـ 26 الشهر.

^{المصدر: Institut français du Liban}

وبحال ما كنتوا بتعرفوا، المعهد موجود جنب MIM Museum، دغري حدّ السفارة الفرنسية. اكبسوا هون لتشوفوا الموقع دغري.

بتعرفوا أي محلّ تاني فيكن تحضروا فيه أفلام ببلاش ببيروت؟ شاركونا بالتعليقات!

شوفوا كمان:

وين تحضر مسرحية ببيروت…7 مسارح لازم تعرفوها