فيلا مكسيكو بالأشرفية انباعت، ومخاوف من بناء برج جديد

بحسب منشور جديد للكاتبة سابين على إنستغرام، فيلا مكسيكو بالأشرفية انباعت، والمنشور أشار لإمكانية بناء برج كبير بحديقة العقار. بس لحد هلّق، ما في تأكيد رسمي على موضوع البرج، وما في إعلان واضح عن شو رح يصير بالعقار.

ومع إنّه الموضوع بعده مش مؤكّد، رجعت الأنظار على مبنى قدر يحافظ على وجوده بقلب حيّ تغيّر كتير على مرّ السنين.

فيلا شاهدة ع تغيرات بيروت

بتعود فيلا مكسيكو لسنة 1933، وبتعتبر من الفلل القديمة اللي بعدها موجودة بالأشرفية. الفيلا عاصرت مراحل كتيرة من تاريخ بيروت، من الانتداب الفرنسي والاستقلال، للحرب الأهلية وإعادة إعمار المدينة، وصولًا لانفجار المرفأ سنة 2020.

سنة 2016، استأجرت مجموعة ABC العقار ونقلت مكاتبها الرئيسية لهونيك. وبالتعاون مع المهندس المعماري اللبناني رائد أبي اللمع وشركته، تمّ ترميم الفيلا مع الحفاظ على طابعها المعماري.

هل الجنينة رح تتحوّل لمشروع بناء؟

هالمنشور سلّط الضو ع مشكلة ببيروت: إنّه الأبنية والفلل القديمة تضل واقفة، بس الأراضي والحدايق حواليها تتحوّل لمشاريع بناء.

وبما إنّه الأراضي ببيروت محدودة، كتير مناطق تغيّرت مع الوقت بسبب الأبراج والمشاريع الجديدة.

حاليًا، ما في تأكيد إنّه رح ينبنى برج بحديقة فيلا مكسيكو، والموضوع بعده مجرّد احتمال. بس إذا صار، رح تخسر بيروت جزء جديد من تاريخها المعماري.

شوفوا كمان:

Costco وصل ع سبينيس بلبنان – كيف الأسعار وشو رح تلاقوا؟