وائل كفوري أعلن عن حفلات صيف 2027 بلبنان، وهيك أسعار التذاكر

“ملك الرومانسية” ع موعد جديد مع جمهوره بلبنان! أعلن الفنان اللبناني وائل كفوري عن حفلات لـ صيف 2027، والتذاكر صارت متوفّرة للبيع من هلّق.

إعلان مبكر للفنان وائل كفوري عن حفلات 2027

بعد النجاح الهائل يلي حققته حفلاته بالصيف، رح يلتقي وائل كفوري بجمهوره بلبنان بحفلتين يومي 31 تموز و1 آب 2027، والموعد رح يكون كالعادة بـ فوروم دو بيروت.

لما ينذكر اسم وائل كفوري، أكيد بتخطر ع بالنا أغاني الحب، المواويل، والصوت يلي صار جزء أساسي من الأغنية اللبنانية. و”ملك الرومانسية” و”ملك الموال” ألقاب رافقته لسنين، وصارت مرتبطة باللون الفني يلي ميّزه وحافظ من خلاله على مكانته عند جمهوره.

حفلاته الأخيرة بآب 2026 كانت أكبر دليل ع محبة الناس، مع حفلتين كاملتين صادفوا عيد الجيش اللبناني، وإقبال واسع من المعجبين. وكالعادة، قدر وائل يحوّل حفلاته بلبنان لموعد منتظر كل صيف، وهلق الموعد تحدد من جديد لصيف 2027.

اللافت هالمرة إنو التذاكر انطرحت بكّير عبر Ticketing Box Office، يعني فيكن تحجزوا من هلّق لحفلات الصيف الجايي عبر الرابط هون.

أديه أسعار تذاكر حفلات وائل كفوري؟

الأسعار بتبلّش من 50$ وبتوصل لـ500$، بحسب الفئة والمقعد. في خيارات مختلفة، من المقاعد العادية وصولاً للفئات الأعلى والأقرب للمسرح:

• VVIP: من 300$ لـ 500$
• VIP: من 250$ لـ 300$
• التذاكر العادية: حسب المقعد 50$ – 75$ -100$ – 150$ – 200$ – 250$ 

مع إنو صيف 2027 بعده بعيد، وائل كفوري بلّش من هلّق يرسم ملامح موسم الحفلات بلبنان. فهل هيدا الإعلان المبكّر رح يكون بس البداية، ونشوف أسماء تانية تلحقه وتعلن عن حفلاتها للصيف الجايي من هلّق؟

شوفوا كمان:

Costco وصل ع سبينيس بلبنان – كيف الأسعار وشو رح تلاقوا؟