All the Creative Studios to Try Around Beirut, From Pottery to Painting شو مشاريعنا

18+ ستوديو ببيروت لتجرّبوا الفخار والرسم والأشغال اليدوية

بيروت فيها كتير ستوديوهات إبداعية بتفتحلكن المجال تجرّبوا هوايات جديدة، تتعلّموا مهارات مختلفة، وتعملوا قطع بإيديكن. سواء بتحبّوا الفخار، الطباعة الفنية، التطريز، الرسم أو صناعة المجوهرات، في أماكن بتستاهل تكتشفوها وتعيشوا فيها تجربة مختلفة. كرمال هيك، جمعنالكن 18+ ستوديو إبداعي ببيروت وحولها، لتختاروا النشاط اللي بتحبّوه وتجرّبوه!

في محل بتعرفوه وما ذكرناه؟ خبرونا عنه!

بقلب بيت لبناني تراثي بمنطقة الجعيتاوي، Poeima House هو مساحة دافية بتشجّع على الإبداع والتجربة. من الفخار والشغل على دولاب الطين، لصناعة الشموع والورشات اليدوية، دايمًا في نشاط جديد فيكن تجرّبوه وتطلعوا منه بقطعة من صنع إيديكن.

من صناعة السجاد بتقنية الـTufting وتشكيل الطين، لصناعة الشموع والمجوهرات والرسم بألوان النيون، Kanvartfuly بيقدّملكن نشاطات إبداعية بتناسب مختلف الأذواق. فيكن تحجزوا ورشة مع مدرّب، تمرقوا لتجرّبوا نشاط من اختياركن، أو حتى تنظّموا عيد ميلاد وجمعة مع رفقاتكن وتختاروا سوا شو بدكن تعملوا.

ستوديو فخار وكافيه بمحل واحد! بـWAY Beirut، فيكن تتعرّفوا على عالم الفخار وتجرّبوا تشتغلوا بالطين بإشراف مختصّين، من خلال ورشات بتعلّمكن الأساسيات. وكمان في جلسات عمل مفتوحة ولقاءات إبداعية بتجمع محبّي هالحرفة.

إذا من زمان نفسكن تجرّبوا الفخار، ستوديو الفنانة ريان يحيى للسيراميك هو فرصة حلوة لتبلّشوا. ريان بتصمّم وبتصنع قطع سيراميك بإيديها وبكميات محدودة، وكمان بتقدّم دروس بالشغل على دولاب الفخار لكل شخص حابب يتعلّم هالحرفة ويجرّب يعمل قطعه الخاصة.

من جلسات الرسم مع المشروبات، لتشكيل الطين والرسم على القزاز وصناعة الشموع، CreativeNass بيقدّملكن ورشات وأنشطة فنية بتخلّيكن تجرّبوا أكتر من هواية بمحل واحد. خيار حلو إذا بدكن تعملوا شي مختلف مع رفقاتكن أو تخصّصوا وقت لتتعلّموا مهارة جديدة.

fabrica مش بس ستوديو سيراميك، هو مساحة للتصميم والحرف بتجمع بين التعلّم والتجربة والإبداع. ورشاتهن بتشمل الشغل على دولاب الفخار، والبناء اليدوي بالبورسلين، والنحت والتزيين، بالإضافة لمعارض وتعاونات مع فنانين محليين.

شو أحلى من جلسة رسم على الفخار مع فنجان قهوة؟ بـCeramic KANVAS، فيكن تختاروا قطعة سيراميك من بين مجموعة خيارات، من فناجين و صحون للمزهريات، و تزيّنوها بالألوان والتصاميم اللي بتحبوها.

ضمن Beihouse، وبعد ترميم هالمبنى، فتح L’Atelier أبوابه كمساحة بتجمع الفن و الإبداع. بيستضيف ورشات فنية ومعارض وتعاونات مختلفة، وبيوفّر فرصة للفنانين و المبدعين يلتقوا و يشاركوا أفكارهن و تجاربهن.

إذا بتحبّوا تتعلّموا كيف تحوّلوا قطعة طين لشي بتستخدموه كل يوم، Ceramics 306 هو ستوديو متخصص بتعليم الفخار. من خلال الورشات، فيكن تتعلّموا أساسيات تشكيل الطين وتصنعوا قطع متل فناجين و أدوات السفرة، سواء كنتوا مبتدئين أو عندكن خبرة وبدكن تطوّروا مهاراتكن.

إذا بتحبّوا تجرّبوا شي مختلف عن الرسم والفخار، Beirut Printmaking Studio بيعطيكن فرصة تكتشفوا عالم الطباعة الفنية والتصوير الفوتوغرافي التقليدي. فيكن تتعلّموا تقنيات مختلفة متل الطباعة الحجرية، و الطباعة البارزة، وطباعة الشاشة الحريرية، و التصوير بغرفة التحميض، من خلال دورات وورشات عملية.

بـNaïve House، النشاط الإبداعي بيجي مع الأكل و المشروبات و الأجواء الحلوة. المكان بيجمع بين اللقاءات و الورشات الفنية، يعني فيكن تقضوا وقت مع رفقاتكن، تطلبوا شي طيّب، و تشاركوا بنشاط جديد وتعملوا شي بإيديكن بنفس الوقت.

من جلسات الرسم ودروس الخياطة، لورشات الكولاج و الطباعة بتقنية الـCyanotype، DADA بيقدّملكن نشاطات فنية متنوعة بتشجّع على التعلّم و التجربة. الورشات بيشرف عليها فنانين و مدرّبين، وبتعطي فرصة تكتشفوا مهارات جديدة وتلتقوا بأشخاص بيشاركوكن حب الفن و الإبداع.

Klei هو ستوديو فخار وكافيه بقلب مار مخايل، وين فيكن تقضوا وقت حلو و تشتغلوا بالطين. فيكن تختاروا بين الشغل على دولاب الفخار، وتشكيل القطع بالإيد، أو تزيين قطعة سيراميك جاهزة ع ذوقكن.

إذا حابين تتعلّموا حرفة جديدة وممكن تحوّلوها لمشروع خاص فيكن، MAJAL Design School بتقدّملكن دورات وورشات عملية بصناعة المجوهرات وتصميم الأقمشة وريادة الأعمال. البرامج بتجمع بين الحرف التقليدية و التصميم العصري، وبتساعد المشاركين يطوّروا أفكارهن و يحوّلوها لمشاريع وعلامات تجارية خاصة فيهن.

124 Atelier مساحة فنية بتستقبل الكبار والصغار، وبتقدّم ورشات بتخلّيكن تجرّبوا أنواع مختلفة من الأشغال اليدوية. من الرسم على القماش والقزاز، للنحت و النشاطات الموسمية، كل المواد اللازمة متوفّرة، و المدرّبين بيساعدوكن خطوة بخطوة لتكمّلوا قطعتكن.

ARTIVA هو ستوديو إبداعي بيقدّم ورشات وتجارب فنية عملية لكل شخص حابب يجرّب شي جديد. ومن أول ما تفوتوا، رح يلفتكن ديكوره الملوّن مستوحى من لوحة The Starry Night للفنان فان غوخ، مع رسومات زرقا بتغطّي الحيطان والسقف وبتعطي المكان طابع مميّز.

إذا بتحبّوا الأشغال اليدوية، Karakeeb Corner بيجمع مجموعة ورشات بتعلّم حرف مختلفة، من الخياطة و التطريز و الكروشيه، للـPunch Needle وغيرها. والأحلى إنكن مش بس بتتعلّموا تقنية جديدة، كمان بتقدروا تاخدوا معكن عالبيت قطعة اشتغلتوا عليها بإيديكن!

داخل بيت قديم وحلو بالأشرفية، مع حديقة بتزيده جمال، L’Autrefois بيجمع بين كافيه، ستوديو بيلاتس ومساحة للورشات الفنية. فيكن تشاركوا بجلسات رسم مع مشروبات، أو تجرّبوا الرسم على المراوح والشنط، وغيرها من نشاطات فيكن تعملوها مع رفقاتكن أو العيلة.

Dream Factory هو كافيه إبداعي فيكن فيه تصنعوا دبدوب على ذوقكن، و تزيّنوا شنط توت، وترسموا على مجسّمات صغيرة، و تجرّبوا نشاطات يدوية تانية. وكمان فيكن تطلبوا مشروب ملوّن أو شي حلو و تستمتعوا بوقتكن!

أي ستوديو رح تجربوا ببيروت؟