وين أجمل منظر مغيب للشمس بشمال لبنان؟

أكيد مغيب الشمس ما بينحضر إلا بأماكن مميزة لتقدروا تشوفوا كل تفصيل وتغيير عم بصير، كرمال هيك حبينا نشارككن ٨ أماكن مميزة بشمال لبنان فيكن تشوفوا منا مغيب الشمس.

١. سيدة البحر، البترون

المغيب من هالمحل رح يخليكن تحسوا إنكن قاعدين على البحر دغري، السور الفينيقي بوجكن والبحر على مد عينكن والنظر.

٢. سيدة الحصن، إهدن

كنيسة بتكشف على أجمل منظر بالشمال، قادرين تشوفوا الوادي المقدس كلو، غمضوا عينكن واسرحوا بأفكاركن لبعيد.

٣. مطل الوديان، حرار (عكار)

مغيب الشمس بقلب الطبيعة إلو طعمة غير لأن إجا بعد طول انتظار وليكون عندكن أجمل منظر مغيب، لازم يكون ورا الوادي وهيدا المحل قاعد على الشير ورح ياخدكن على غير عالم وقت المغيب.

الرقم: 487 713 03

٤. سمارولا، الأرز

لما الشمس تغير ألوانها وتعكس الألوان على الوادي، بصير المنظر متل شي لوحة فنية، بتحسوا حالكن فوق الغيوم وفيكن كمان تطلبوا شي طيب أو شراب وتقعدوا على المراجيح.

الرقم: 933 923 81

٥. مزار مار الياس، حدشيت

محل بيكشف على كل الوادي المقدس، بتحسوا حالقدن قاعدين فوق الغيوم والسما قريبة، بتطلعوا لتحت بتلاقوا الوادي مقسوم تنين يلي لحالو قصتو قصة، عنجد متل شي حلم هل منظر.

٦. أونا دي سول Ona de Sol Beach Bar، شكا

قعدوا على المرجوحة وتفرجوا على الشمس عم تغيب ورا البحر، كيف ما تبرموا بتشوفوا البحر الأزرق وبتسمعوا صوت الموج. فيكن تسبحوا كمان أو تاخدوا شراب ملون وتناموا على الرملات وتخلوا خيوط الشمس تغمركن.

الرقم: 456 424 70

٧. كامببنغ Camping Lebanon، مزيارة

هل محل عندو قعدة بتطير العقل مع مراجيح وكراسي ملونين، وقت المغيب رح تحسوا حالكن بغير عالم وغير بلد، من القعدة للموسيقى للأجواء، عنجد تجربة كتير حلوة.

الرقم: 007 005 81

٨. جبلنا، القبيات

لما الخضار بيغمر الوديان والجبال بيطلع هل محل. قاعد بقلب الغابة وبين شجر الصنوبر، وقت المغيب رح تطيروا فوق الغيوم لتشوفوا أجمل منظر ساحر بحياتكن.

الرقم: 935 542 03

شوفوا كمان، ٢٣ محل لازم تزورهن هالصيفية بلبنان.