من الكتب للورشات: فُلك بيروت مساحة ثقافية جديدة بالحمرا
خبرية حلوة رح تفرّح كل محبّي القراية ببيروت: فُلك بيروت، مكتبة ومساحة ثقافية جديدة، فتحت أبوابها بقلب الحمرا.
فُلك مش بس مطرح بتروحوا عليه لتشتروا كتابكن المفضّل. هي مكتبة مركّبة ومساحة ثقافية بتجمع بين الكتب، اللقاءات، والإبداع. فيها رفوف مليانة عناوين متنوعة، مساحة هادية للقراية والدراسة، متجر صغير للكتب والتذكارات، ومشغل مخصّص للورش الفنية والثقافية.
وكمان، فُلك عم تحضّر برنامج من ورشات شعرية، لقاءات أدبية، وحوارات بتجمع القرّاء والكتّاب والفنانين وكل حدا بحب الحكي ومشاركة الأفكار.
شو يعني مكتبة مركّبة؟
المكتبة المركّبة بتتخطّى فكرة المكتبة التقليدية. يعني مساحة فيها أكتر من دور: مكتبة، متجر للكتب وتذكارات، ورشة ثقافية، وبرنامج فعاليات أدبية وفنية.
هي مساحة بتجمع تجارب ثقافية مختلفة. مكان ممكن تقعدوا فيه مع كتاب، تحضروا نقاش، تشاركوا بورشة، أو حتى تتعرّفوا على ناس عندن نفس الفضول والشغف.
من البيت للمدينة
أول ما تدخلوا، رح تشوفوا في لمسات شخصية وبيتوتية واضحة. فكرة المشروع بلّشت أساسًا من البيت، من جوّ بسيط بيجمع الناس حوالين القراية، قبل ما تكبر وتفتح عالمدينة كمساحة بتستقبل القرّاء، الكتّاب، الفنانين، والطلاب.
هالروح بعدها موجودة بالمكان: دافية، حميمة، وبتحسّسكن إنكن مش بس داخلين على مكتبة، بس على بيت فيه كتب وحكايات.
ليه اسمها «فُلك»؟
الاسم بحدّ ذاته فيه معنى شعري. «فُلك» بالعربي يعني سفينة أو مركب.
استعارت فُلك اسمها من فكرة المركب، مش بس للعبور والتنقّل، بس كمكان للّقاء والتجمّع. مركب بيحمل كتب، حكايات، أفكار، وذكريات من ضفّة لضفّة.
وكمان الاسم مرتبط ببيروت نفسها، المدينة المفتوحة عالبحر وعالعالم، واللي دايمًا حضورها بالذاكرة مربوط بالبحر الأزرق وأفقه الواسع. ومن هالمعنى، بتبين «فُلك بيروت» كأنها امتداد لروح المدينة البحرية: فُلك صغير راسي بقلب الحمرا، حامل كتب وأفكار وتجارب ثقافية متنوعة.
شو فيكن تتوقّعوا؟
فُلك من الأماكن اللي فيكن تقروا فيها بهدوء، تمرقوا عليها مع رفقاتكن، أو تتعرّفوا على ناس جداد. هي مكتبة مفتوحة لكل حدا بيحب يلاقي مساحة فيها فضول وإبداع.
المحل كمان فيه أماكن رح تستضيف قريبًا معارض تصوير وفن بتتغيّر بشكل دوري. هالمعارض رح تحوّل الحيطان لمساحات بتعرض وتحفظ الذاكرة البصرية، وبتكمّل القصص اللي عم تنحكى بين رفوف الكتب.
بقلب حيّ معروف بكتبه، كافيهاته، وحياته الثقافية، فُلك بيروت عم تضيف روح جديدة للحمرا!
📍 العنوان
الحمرا، حي الوردية، بالبناية المقابلة للفكهاني، الطابق الأول.
اكبس هون لتعرفوا الموقع بالتحديد.
⏰ الدوام
كل يوم من الساعة 12 الضهر وحتى 8 المسا
📞 للتواصل
تواصل معن عبر إنستغرام من هون.
