سوق الورد راجع هالخريف ع البترون (الدخول مجاني)

ريحة الورد، ألوان الخريف، شوية موسيقى وبرمة بالسوق… شو بدكن أكتر لويك-إند حلو بالبترون؟

هالخريف، سوق الورد راجع ع سوق البترون القديم بنسخته الخريفية، ب 10 و11 تشرين الأول، ليجمعكن بنهارين حلوين بين الورد، النباتات، الحرف، الموسيقى واللقمة الطيبة.

من 10 الصبح للـ4 بعد الضهر، فيكن تتمشّوا بين البسطات، تختاروا الورد اللي بتحبّوه وتعملوا البوكيه الخاص فيكن، أو تاخدوا بوكيه جاهز عالبيت. وإذا بتحبّوا تضيفوا كم زريعة عالبيت، رح تلاقوا كمان نباتات داخلية وخارجية، فازات وعلب بأشكال وأحجام مختلفة. ونصيحتنا؟ تعوا بكير كرمال تلحقوا الورد وهو بعدو فريش.

وطبعًا، ما بيحلى صباح بالسوق من دون شي طيب. رح تلاقوا سناكات خفيفة، مشروبات خريفية، مونة، عصير، حلويات وخيارات أخف وصحية.

وإذا بتحبّوا تطلعوا بشي من صنع إيدكن، فيكن تلوّنوا بوياتكن الخاصة، تتسوّقوا من البسطات وتكتشفوا قطع مميّزة مصنوعة بحب.

وبين هيدا كلّه، رح ترافقكن الموسيقى الحيّة وعازف أكورديون، ومعهن رسم بورتريه بيكمّل أجواء النهار الحلوة.

هالويك-إند، خلو وجهتكن ع البترون… ورد، خريف، موسيقى وشوية سعادة ناطرتكن بـ سوق الورد – البترون.

📍 سوق البترون القديم – بين Fuaki وThe Corner Hub
🗓️ 10 و11 تشرين الأول
🕙 10 الصبح – 4 بعد الضهر
🎟️ الدخول مجاني

شوفوا كمان:

15 مطرح بقلب بيوت تراثية ببيروت