مهرجان التفاح بسكنتا: أكل طيب، قطاف التفاح، وأجواء للعيلة (الدخول مجاني)

التفاح بيجمعنا… وضيعة بسكنتا جاهزة تستقبلكن بأحلى أجواء خلال مهرجان مواسم التفاح 2025!

من 3 لـ5 تشرين الأول، الضيعة الصغيرة رح تتحوّل لعالم مليان ألوان وفرح، ريحة التفاح الطازة، ونشاطات ممتعة لكل الأعمار. هالمهرجان مجاني وبتنظمه بلدية بسكنتا، وهدفه مش بس عرض التفاح ومنتجاته، بس كمان دعم المزارعين، الاحتفال بالتراث والطبيعة، وكل شي حلو ومنحبو ببسكنتا.

مهرجان مجاني للضيعة كلها!

بالسوق الكبير رح تلاقوا تفاح طازة من البساتين، المونة البلدية الطيبة، أكلات لبنانية بتفتح النفس، وأعمال حرفية وفنية بتسلي الكل. والكبار والصغار رح يلاقوا شي يبسطن: رحلات مشي بين ربوع بسكنتا، نشاط قطف التفاح من البساتين، وبرامج خاصة للطلاب تخليهن يعيشوا تجربة المزارعين الصغار.

برنامج مهرجان التفاح بسكنتا:

يوم الجمعة 3 تشرين الأول: النشاط بيبلش عالـ12 الضهر مع زيارة طلاب المدارس للمهرجان، وفي افتتاح السوق عالـ5 المسا. بعدها عالـ7:30، فرقة فولكلورية مع دبكة وزفة، ومنختم عالـ9 المسا مع DJ Béro يلي رح يخلي الكل يرقص ويغني. والولاد مش رح يزهقوا أبدًا، مع ألعاب VR، ألعاب إلكترونية، وتحديات ممتعة تخليهم يضحكوا ويلعبوا لساعات.

نهار السبت والأحد، 4 و5 تشرين الأول: النشاط مستمر مع قطف التفاح، هايكنغ بين الطبيعة، ورحلة بالبيسكلات لعشاق المغامرة والهوا الطلق.

مش بس هيك، في مسابقات حلوة لتزيد الحماس والفرحة! إذا صوتكن حلو، المسرح رح يكون إلكن لتفجروا مواهبكن مع فرقة موسيقية مباشرة، وفي جوائز قيمة للأوائل. وكمان معرض مسابقة التصوير الفوتوغرافي “بسكنتا بعيونك” مع توزيع جوائز للفائزين.

مهرجان مواسم التفاح ببسكنتا مش بس مناسبة لنحتفل بالتفاح، هو عيد لكل الضيعة، للصغار والكبار، ولكل يلي بيحب الطبيعة والفن. الدخول مجاني، والأجواء رح تكون مليانة فرح، ألوان، موسيقى، وتفاح طيب.

يلا، بسكنتا ناطرتكن ع أحلى موسم تفاح! 🍎🍏

الصور مأخودة من صفحة أخبار بسكنتا.

حبيتوا هالمقال؟ شوفوا كمان:

الخريف بلبنان غير…14 مهرجان خلال تشرين الأول 2025