مواعيد جديدة لرمي النفايات وتفريغ البضائع ببيروت… وضبط للمخالفين

بلدية بيروت عم تنظّم أوقات رمي النفايات وتفريغ البضائع بالعاصمة، ورح تبدأ بتطبيق المواعيد الجديدة بشكل صارم بمنطقة الحمرا، قبل ما تقيّم التجربة وتشوف إذا ممكن تعمّمها ع باقي شوارع بيروت.

وبحسب البلاغ رقم 10299 الصادر عن محافظ بيروت مروان عبود، بتشمل المواعيد المطاعم والمقاهي والملاهي الليلية والفنادق والمستشفيات والجامعات والمدارس والمراكز التجارية والمجمعات السكنية الكبيرة، وغيرها من المؤسسات التجارية والسياحية والتربوية والخدماتية.

أوقات رمي النفايات:

مسموح رمي النفايات من الساعة 8 المسا لحد 12 بالليل، وبالمستوعبات المخصصة إلها فقط.

يعني ممنوع تنترك النفايات ع الرصيف أو بالشارع أو حدّ المستوعبات خارج هالوقت المحدد.

أوقات تفريغ البضائع

تفريغ وتحميل وتنزيل البضائع مسموح من 5 لـ7 الصبح فقط.

وأي عملية تفريغ خارج هالوقت ممكن تعرّض المخالفين لمحضر ضبط.

بداية التطبيق من الحمرا…

البلدية اختارت الحمرا كمنطقة نموذجية لتجربة هالنظام ومعرفة فعاليته بتنظيم الشوارع وتحسين النظافة. وبعدها رح تدرس إمكانية تطبيقه بمناطق تانية من بيروت.

والبلدية طلبت من السكان وأصحاب المؤسسات الالتزام بالمواعيد والتعاون، فيما رح تتابع التنفيذ واتخاذ الإجراءات فرق حرس مدينة بيروت ومصلحة النظافة والأجهزة البلدية المختصة.

شو رأيكن بهيدا البلاغ الجديد؟ شوف قسم #أخبار على موقعنا للمزيد.

شوفوا كمان:

في عصير Maccaw مقلّدة بالسوق؟ خلونا نشوف شو القصة